ທ່ານ ໂຮ ຍຸນຊິນ ຕາງໜ້າອົງການຄຸ້ມຄອງດ້ານສິ່ງແວດລ້ອມສາກົນ DAS ໄດ້ເປັນກຽດມອບໃບຢັ້ງຢືນການບໍລິຫານສິ່ງແວດລ້ອມຕາມມາດຕະຖານ ສາກົນ ISO 1400:2004 EMS ໃຫ້ເຂື່ອນໄຟຟ້ານ້ຳງື່ມ 1 ໂດຍແມ່ນທ່ານ ສີສະຫວາດ ທີຣະວົງ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ເປັນຜູ້ກ່າວຮັບ.
ພິທີດັ່ງກ່າວໄດ້ຈັດຂຶ້ນໃນວັນທີ 22 ກຸມພາ 2012 ນີ້ ທີ່ສຳນັກງານໃຫຍ່ ລັດວິສາຫະກິດໄຟຟ້າລາວ ໂດຍເປັນກຽດເຂົ້າຮ່ວມຂອງທ່ານ ຄຳມະນີ ອິນທິລາດ ລັດຖະມົນຕີຊ່ວຍວ່າການກະຊວງພະລັງງານ ແລະ ບໍ່ແຮ່ ພ້ອມດ້ວຍບັນດາແຂກ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ສີສະຫວາດ ທີຣະວົງ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ໄດ້ໃຫ້ຮູ້ວ່າ: ການທີ່ເຂື່ອນໄຟຟ້ານ້ຳງື່ມ ໄດ້ຮັບໃບຢັ້ງຢືນ ISO 1400:2004 EMS ເປັນການຢັ້ງຢືນຜົນສຳເລັດທີ່ສຳຄັນໃນການປະກອບສ່ວນເຂົ້າ ການຈັດຕັ້ງປະຕິບັດແນວທາງແຜນຍຸດທະສາດຂອງພັກ ແລະ ລັດເຮົາ ເປັນຕົ້ນແມ່ນແນວທາງ ແລະ ຍຸດທະສາດກ່ຽວກັບການປົກປັກຮັກສາສິ່ງແວດລ້ອມແບບຍືນຍົງ ຜົນສຳເລັດໃນຄັ້ງນີ້ ຈະເປັນການສ້າງຕົວແບບອັນໜຶ່ງ ໂດຍສະເພາະແມ່ນໃນຂະບວນການຈັດຕັ້ງປະຕິບັດແນວທາງຫັນເປັນ ອຸດສາຫະກຳ ແລະ ທັນສະໄໝ ທີ່ຄຳນຶງເຖິງສະພາບແວດລ້ອມເປັນບັນຫາບູລິມະສິດ ຄຽງຄູ່ກັນນັ້ນ ການທີ່ເຂື່ອນດັ່ງກ່າວໄດ້ຮັບໃບຢັ້ງຢືນນີ້ ຈະເປັນການສ້າງສະພາບແວດລ້ອມສຳລັບການດຶງດູດການລົງທຶນໃຫ້ ຂະຫຍາຍຕົວຕື່ມ ໂດຍສະເພາະຈະເປັນການເຮັດໃຫ້ຜູ້ລົງທຶນທັງພາຍໃນ ແລະ ຕ່າງປະເທດ ໃນການເຂົ້າຮ່ວມລົງທຶນເພື່ອພັດທະນາໄຟຟ້າລາວ ມີຄວາມໜັກແໜ້ນຂຶ້ນ ໂດຍອົງການສິ່ງແວດລ້ອມສາກົນໄດ້ໃຫ້ການຮັບຮອງແກ່ເຂື່ອນໄຟຟ້າ ນ້ຳງື່ມ ຂະບວນການນີ້ແມ່ນໄດ້ດຳເນີນຢູ່ໃນບັນດາປະເທດທົ່ວໂລກ.
ປັດຈຸບັນບັນຫາສິ່ງແວດລ້ອມພວມກາຍເປັນບັນຫາໜຶ່ງທີ່ສຳຄັນອັນ ໜຶ່ງຊຶ່ງບັນດາລັດໃນທົ່ວໂລກ ແລະ ບັນດາອົງການຈັດຕັ້ງສາກົນ ໄດ້ເອົາໃຈໃສ່ເປັນພິເສດ ຍ້ອນວ່າໃນຊຸມປີຜ່ານມາ ການບໍລິຫານສິ່ງແວດລ້ອມການຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດ ຢູ່ບັນດາປະເທດທີ່ພັດທະນາແລ້ວ ກໍຄືປະເທດທີ່ກຳລັງພັດທະນາເປັນໄປຢ່າງຟູມເຟືອຍ ຂາດການດັດສົມຢ່າງເປັນລະບົບ ອັນເປັນສາເຫດພາໃຫ້ສິ່ງແວດລ້ອມເກີດຄວາມເຊື່ອມໂຊມ ພາໃຫ້ເກີດການປ່ຽນແປງທາງທຳມະຊາດ ເຊັ່ນ: ມົນລະພາວະອາກາດເປັນພິດ ສະພາບໂລກຮ້ອນ ໄພນ້ຳຖ້ວມ ແຫ້ງແລ້ງ ແຜ່ນດິນໄຫວ ແລະ ອື່ນໆ ຢູ່ໃນແຕ່ລະບໍລະເວນຂອງໂລກຢ່າງຕໍ່ເນື່ອງ.
ຂ່າວຈາກ ໜັງສືພິມວຽງຈັນໃໝ່
ເສດຖະກິດ-ການຄ້າ-ການລົງທຶນ 
You must be logged in to post a comment.